MOP PAPUA :D

Surat Ijin

Anak 1 de nama Septinus, de paling rajin pi sekolah. 1x de sakit, jadi mo bikin surat tapi de tra tau, jadi minta tolong de bapa.
Pace juga tra bisa bikin, jadi pace bikin surat versi puisi.... Pace tulis begini:
Di pagi yang cerah....
Matahari bersinar terang...
Bunga-bunga kembali mekar...
Namun ada 1 yang layu... Septinus yang layu...

Parangisasi

Pace 1 kuliah di jawa, trus dia tulis surat buap dia pu bapa dong di kampung :
Bapak, mengingat karna uang ADMINISTRASI serta uang SEMESTERNISASI yang
meningkat & uang PACARANISASI yg smakin bertambah, maka uang TRANSFERISASI
bulan ini tolong dinaikkan.
trus surat tiba di kampung & pace ko baca, langsung dia balas :
Anak, mengingat karna hasil KEBUNISASI & PANENISASI yg berkurang,
maka sebaiknya anak ko pulang dulu untuk MENCANGKULISASI di KEBUNISASI
supaya bisa bayar ko pu PERMINTANISASI, kalo trada nanti PARANGNISASI
menyusul kesitu.

Salah Ucap

malam minggu.. pace 1 mo pi jemput de maitua (maitua nama Susi)
tapi pace pikiran kaco... stresss karna Susi pu bapa jahat skali.
tapi karna DEMI CINTA ka ini.. de tabrak saja...
..........
Su tiba di depan Susi pu rumah... de ketuk pintu.. pas yang buka pintu Susi pu bapa yang muka jahat skali.. hampir kincing calana...
sebenarnya de mo bilang "malam om, Susi ada kah"..
tapi karna su gugup jadi pace de bilang begini : "Susi om, malam ada kah???"
Panakut pu kerja to

Speaking english

Pada suatu hari,ada pace deng de pung anak jual pisang dipinggir jalan.kebetulan jalan itu menuju pantai yang banyak didatangi turis asing.

Ada bule 2 orang lewat  liat tu pisang. trus bule yang laki2 tunjuk kearah pisang dan bilang ke de pu teman,

"this is banana"

anak de jengkel,de kira bule bilang dong pu pisang ba nana(maksudnya bernanah)

anak langsung lapor de pu pace.de pace pu langsung datang kebule. pace bentak bule dengan sangat marah begini."
heh,tong pu pisang ni masih baru.masak ko bilang banana?Ko su jago kah??
Ayo tong baku pukul."

Trus bule yang kaget stengah mati karena pace marah langsung bilang "I'm sorry. I'm sorry".
pace langsung sambung, "tara usah sore-sore,sekarang saja!ko takut kah??"

bule sambung lagi, "do you know speaking english?"
pace de sambung ,"klu brani pakai tagan kosong.tra usah pake kunci inggris!!!!"

MOP adalah cerita lucu khas papua..